U NATALE DE' POVARIELLI
A' zampugna era vvecchia:
e d'ogni canna
i gruppi li s'èranu allargati;
'a pelle de muntune 'un sustenia,
e ru jatu nescia de ogni banna.
Cusuta, annudicata,
supra 'e canne 'ncirata,
ppe ra fare sonare ccce volia
'nu maantice de forgia.
Ma Rusaru era ppuru vecchiariallu
cumu 'a zampugna chi strincia a ru piettu
ed abbrazzava cumu 'na criattura.
Jujjhava, 'e prunelle arrussicannu
e ll'uocchi nescia bellu 'ntunatu
cumu 'a vuce amurusa de lu core
de chi l'avia sonata 'n giuventù.
Quante novene e quante sirinate,
quante sonate sutt' 'i stilli e quante
canzunelle d'amuri e de rifèta!
Ma mo' sì carmu cumu 'nu prufeta
e ssuoni avanti 'a cona d' 'u Bumminu
intra 'na cammarella affumicata,
fra cariòle e linguielli de jacchère.
'Ntùornu 'ntùornu tri ffigli e ra mugliere
malata e janca cumu 'na cannila.
Ma 'a tavula è conzata:
'nu vuccellatu scuru scuru e granu,
tri pesche 'e baccalà fatte frijute,
due limme 'e vermicielli assai cunnute,
ficu siccate, puma e partugalla,
'na vozza e' vinu, 'nu turrune l'unu,
e cullure 'nsardate.
Tutta 'na grazia e Ddiu ppe chilla sira,
ch'era 'nna sira tanto arricurdata.
'U zampugnaru avìa pp'ogni sonata
guadagnatu 'na lira,
'nu panaru de nuci ccu castagne
ficu 'mpurnate e jette a tri piruni.
Ed illi, chi nun eranu manciuni,
ccu quantu ricoglìaru chilla sira
putìanu jìre avanti 'na simana
ppe doppu, lu Segnure pruvidìa!
Finitu de sonare, a caputavula
s'assetta, 'a mugliuere surridente
(ca para ru visagggiu d' 'a salute)
cumu si nun avissi avutu nente,
fa ppe ru minestrare.
Ma Rusare se leva e vva a ra porta,
a' spalanca: se vida 'n 'urra e luna
supra 'a catoja de 'na povarella
chi canta sula sula 'na canzuna
de Natale, 'nginùocchiju, a 'nnu spuntune
aspettannu mu' nèscia 'u Redentore,
-ohi cummarella, cummari Furtuna!
Vieni ccu nnue cà simu povarielli
cumm'e ttie. su' pronti i vermicielli!
Cumu nne podi jire de penninu
'stu manciare ch'avimu guadagnatu,
sapìennu ca lu prossimu è 'ncamatu?
Nessun commento:
Posta un commento